Kää Faasend ohne Kiechelcher: So genn se gemacht!

Saarbrigge: Kää Faasend ohne Faasendkiechelcher! Aach, wenn se diesjohr schunn widda ins Wassa fallt, unsa Faasendkichelcher lasse mir uns nidd maadisch mache! Unn das brauche na fier se bagge : 125 ml Milch, 100 g Budda odda Margarine, 500 g Mähl, 1 Päggelsche Trockenback-Heef (die vom Corona-Hamschdern 2020 misst noch gudd sinn), 30 g Zugga, 1 Päggelsche Vanillzugga, 3 Trobbe Rum-Aroma (die kläne Reehrscha do, kamma awwa ach weglasse), 1 Teeleffel voll Salz, 2 Eier, 1 Eigelb, außerdem noch e Flasch Sunneblumeeel odda Frittierfett, noch meh Zugga unn Zimt, Sießschmeer odda Laquerisch (wer will).

Weiter nach der Werbung
Da erschd mache mir die Milch innem klääne Dibbe warm und schmelze die Budda odda Margarine do drin. Dann mache mir es Mähl und die Corona-Hamschder-Heef in e Riehrschissel unn mache alles mo scheen durchenanna. Jetzt de Reschd von de Zutate dabei unn die Milch mit dem Fett aus dem Dibbe. Jetzt muss ma de Heefdeisch ordentlich riehre unn knete, bissa nimmeh am Rand von da Schissel klääwe bleibt.
Weiter nach der Werbung
Wer nit gäär klewwerisch Hänn hat, der hollt de Mixer mit de Riehrstääb drahn. Wemma ferdisch sinn, de Deisch abdecke, weil der jetzt erschdmol uffgehn muss. Wenna ordentlich uffgang is (ungefähr uffs doppelte), dann rausholle, nommo kurz kneede unn dann mim Welljaholz ungefähr daumedick ausrolle. Jetzt e Glas (am beschde geht es Saarlodri-Sempfglas von 1987) mim Rand in Mähl tunke unn dann Kreise aussteche unn uff e Holzbräät odda e Backblech drufflehn (es soll aach Leit genn, die rolle die Faasendkiechelcher wie Klees… dann genn se awwa nit so scheen lufdisch).
Weiter nach der Werbung
Jetzt e bissje Mähl driwwa siewe unn mit em Gescherrduuch odda Backbabbier abdegge. Die misse jetzt nommo uffgehn. Jetzt kamma als mo dat Eel in e Dibbe schidde unn heißmache. So ungefähr 175 Grad. Wenn ma e Riehrleffel verkehrterum ins Eel hält unn es kumme Bläsja ruff, isses genau rischdisch. Awwa in da Friddees getts aach. Jetzt imma e paar Faasendkiechelcher koppiwwa ins heiß Eel lehn und erschd uff da äähn unn dann uff da anna Seit goldisch ausbagge.
Weiter nach der Werbung
Rausholle unn uff Kichebabbier abtrippse losse. Dann noch in Zugga unn Zimt wänzeln unn kalt genn lasse. Hinnaher kamma noch Sießschmeer odda Laquerisch middem Spritzbeidel odda da Gebäckspritz rinn mache. Mahlzeit unn Alleh hopp!

Trick 17: Wenn ihr nit warte wolle, bis der Deisch gang is, dann riehre den schunn owends ahn und stelle ne iwwa Naacht inna Tuppaschissel in de Kühlschrank odda in de kallde Keller. Der geht dann vun allään uff bis daachs druff unn ihr kinne gleich bagge!

Werbung